manjalo Tua ni Gondang Ulaon di gereja

Amang pande namalo, na hot di ula-ulana

Na hot dipoda naso marlaok bota

Nahundul dipatuan hot dibonggar ni ruma

Pasahat-sahat dungdang pasahat-sahat tona

Marhite hata ni Tuhanta

Manat amang unang tarrobung

Nanget unang tarlinsir

Di ruhut ni panggualon unang adong be nahurang

Satahi saoloan unang adong namimir.

Antong pande nami

Ling-ling majolo tagadingmi...

Huruk majolo sarunemi ....

Amang pande namalo,

Nunga manat hutangi hami dang adong be na hurang

Nunga tio songon mata ni mual

Rintar songon bonang ni gala, badia songon suru-suruan

Ompungta do mandok:

Sulum ni gomgoman porhis lumunta-lunta

Adat, uhum dohot agama do hajongjongan asa horas hita saluhutna.

Laho mamona-monahon ulaon on 

Ima pesta syukur dohot permohonan

Di hari Raya raya Kristus Raja Semesta Alam

(Bahen damang majolo gondang sipitu buhi

Ima gondang sabungan)

(hot di inganan nabe UNANG ADONG NAMANORTOR )

Amang pande namalo,

Ala ulaon hadebataon do ulaon muani, ulaon na maharsantian

Namardomu tu adat ni habatakhon.

Asa ias hita sohapurpuran, puti sohaliapan,

badia songon suru-suruan.

Alu-aluhon ma tu Debata Si Tolu Sada ima : Debata Ama , Anak, dohot Tondi Porbadia

Asa Ibana mamasu-masu ulaonta on dibagasan dame . Sonang soharibo-riboan ias soada mara.

Siraja inda-inda siraja indapati

Pajujung-jujung pinggan di hos ni mataniari

Pasahat-sahat dungdang pasahat-sahat tona tu Debata Mulajadi

Asa horas hita dipamatang martua nang di tondi.

Alu-aluhon ma tu inanta Maria nabadia dohot tu angka hatopan ni halak nabadia, dohot tu suru-suruan ni Debata Mulajadi.

Asa gundurma pangalumi, Ansimun ma pangalambohi .

Molo adong namarhurang lobi. Manganju ma Debata dihami

Aluluhon ma, panggomgomi ni huria ima :

Amanta Paus, Uskup, Pastor, Parhlado ni hurianta Dohot sahala raja, amanta raja dohot inanta soripada na adong di luat on!

Mauliate ma amang pandenami . Ala naeng mulaanta nama ulaon on

Debata do namandok : Alfa Omega lapatanna : Debata do bonana Debata do ujungna. Debata do namamungka asa horas hita saluhutna.

1. Ompunta parjolo do namandok : Sianjur mula-mula sianjur mula tompa. Parsirangan ni aek pardomuan ni hosa. Mula ni marlundu mula ni marlata. Na untopap pusu-pusu mula ni onggak marsuara. Debata do na mamungka asa horas hita saluhutna.

Antong pande nami, bahen damang majolo gondang mula-mula

2. Amang pande namalo!

Adat ni ompungta dalihan natolu

Manat mardongan tubu, elek marboru,

somba marhula-hula.

Somba ni maduma somba na tinompa

Debata do sombaonta asa horas jala torhis hita saluhutna

Antong bahen damang majolo gondang somba.

3. Amang Pande na malo ala neng mangaliat ma bona ni hasuhuton Ima Akka pangulani huria DPS DPL Sude pengurus gereja Ima di pogu ni alaman ni gereja on Ima namarsangap namartuaon sigomgom nasa pangisinaon, pangantaran ni anak raja  dohot Boru ni raja.

Songon nidokni natua-tua madohonon :

Denggan do tano liat mambahen parik ni parhutaan

Dison hami naeng mangliat bona ni hasuhuton Sude pengurus gereja

Asa liat gabe liat horas di hita sude naliat naloloon

Antong baen damang majolo gondang mangaliat ,Gondang Sampur marorot Asa tong-tong Debata dihita na mangarorot.

4. Amang  Pande namalo !

Naputi sohaliapan sori sohabubuhan ias soada mara.

Aek do daon ni ngenge topot – topot do daon ni dosa.

Asa gundur pangalumi ansimun pangalambohi

Molo adong dihami namarhurang lobi

Asa manganju Debata Mula Jadi di hami.

Antong baen damang majolo gondang solsol ni roha,di hami.

Anggiat marhite i , disesa Debata angka dosanami.

Asa ias hami sohapurpuran ,puti sohaliapan , ias soada mara.

Baenma Gondang Parsiarabu songon panolsolion tu Debata,huhut mangelek elek pasupasuNa. Asa marsisiukan hami manang marsiolopolopan angka Pangulani ni huria, DPS DPL KATERGORIAL 

Penutup (hasahatan)

5. Amang Pande namalo , Amang sihopo  hopo

Malo do nian hami alai Pande do anggo ho

Sude pangidoan nami tung denggan do di bahen ho.

Ompunta do mandok : Si raja inda – inda si raja Indapati Pajujung-jujung pinggan di hos ni mataniari Hamu do pandenami Pasahat-sahat tangiang tu Debata Mula Jadi, Asa horas hami di pamatang martua nang di tondi

Ala buhuan nami nama tor-tor namion Ompunta do mandok :

Ladang ni siantar matio pangasean ni parmahan,

Gondang sitio-tio do anggo pangolopon ni parhorason.

Na uli do napinio asa tampe pasu-pasuan,

Somba tangan mangido di basa-basa ni Tuhan.

Baen damang gondang sitio-tio laos padomu ma tu gondang hasahatan