ULAON ADAT PASAHAT ULOS MULA GABE

Ulaon Pasahat ulos mula gabe ima ulaon adat batak na ro parboru ( hula hula ) tu bagas ni helana/boruna dung mardenggan pamatang ( managam haroan ) boruna 6 bln - 7 bln laho pasahat ulos na nigoaranna ULOS MULA GABE

Ragam do goar goar ni adat pasahat ulos mula gabe, di nadeba idok mangirdak, mambosuri, 7 bulanan, mandekkei boru, dohot lan na asing dope alai molo na joloi di goari mai  pasahat ulos tondi

Tarsongonon ma sada tudosan ulaon pasahat ulos mula gabe

Dung sikkop sude haroro ni uduran ni parboru ( hula hula ) suang songoni suhut paranak dohot na piniona, hundulma parboru ( hula hula ) di juluan ( halang ulu ) marsidompahan dohot uduran ni paranak, dungi mamukka pakkataion ma paranak marhite hata huhuasi sian parhatana

PARHATA NI PARANAK

Mauliate ma tapasahat tuTuhanta pardenggan basai, ala asi dohot holong ni rohana na tong tong mandongani jala mangiring iring hita boi hita pajumpa namarhula hula marboru dibagasan hahipason dohot las niroha.

Mansai las situtu do rohanami Rajanami di haroro muna on, jala laos udur do hami namarhaha anggi pamoruan muna dohot boru bere suang songoni dohot dongan sahuta nami manjalo haroro muna.

Raja nami, raja ni hula hula, asa parjolo ma hami marsomba sampulu jari jari pasampulu sada simajujung diakka hata na hurang lobi nanaing sihatahonon nami

Nuaing pe tutu nunga marnatampak rajai namardongan tubu dohot inanta soripada suang songoni udur rap dohot boru muna, tarsongon dia ma raja nami sintuhu ni haroro muna. Botima

PARHATA NI PARBORU

Horas ma jala gabe, gabe ma jala horas, mauliate ma tutu di Tuhanta ala di iring iring jala di dongani do hami sian bagas nami be, hipas ro mandapothon hamu pamoruon nami suang songoni hamu na hudapothon hami tong tong dibagasan hahipason

Taringot di sukkun sukkun munai amang boru, ima di sintuhu ni haroro nami, silas ni roha do amang boru, ima di na ro boa boa suruan ni hela nami naung di oloi Tuhanta Pardenggan basai tangiangta, ima naung manggora pamuro, managam haroan boru nami, parumaen muna

Hombar tusi ma haroro nami amang boru, na naing pasahat ulos mula gabe tu boru dohot hela nami. Botima

PARHATA NI PARANAK

Mauliate ma raja nami, raja ni hula hula, tung mansai las situtu do attong roha nami, dipatudu hamu do burjumuna tu hami pamoruan muna tarlumobi ma i tu boru dohot hela muna, songon nidok ni natua tua

Aek na tio, riong riong di pinggan pasu

Hula hula na burju do hamu, na girgir mamasu masu

On pe raja nami, partikkianon hupasahat hami ma tu hamuna. Botima

PARHATA NI PARBORU 

Mauliate ma amang boru ala na naing pasahathon ulos mula gabe ma hami, asa mangarade ma boru dohot hela nami

PARHATA NI PARANAK

Nauli raja nami

On pe mangarade ma hamu anak dohot parumaen nami

NB : Parjolo ma martangiang baru pe dipasahat natoras ni si boru sipanganon upa upa, dungi ulos mula gabe baru pe boras si pir ni tondi

HATA MANGUPA SIAN NATORAS NI SI BORU

Di ho Inang, boru hasian dohot di hamu Amang Hela. Di son hupasahat hami sipanganon upa-upa tu hamu, asi ma attong roha ni Tuhani sai ro ma di hamu angka na tio tu joloan ni ari on, jala tiur ma haroan na tapaima-ima. On ma Inang, borukku sipanganon na tabo, sipanganon na las, asa las ma dagingmu, las ma nang partondionmu Tung songon i pe nuaeng dohot dengke na hupasahat hami on, las ma rohamuna manganhon ( Dung i disulanghon inanta ma indahan rap dohot dengke tolu hali tu boruna i, dung i dipainumhon ma muse aek sitio-tio, laos didok  ma hatana 

Asi ma rohani Tuhanta, sai tiur-tiur ma haroan na tapaima-iama. Horas ma na pinaima, horas ma hita na paimahon. Botima.

HATA PASAHAT ULOS MULA GABE SIAN NATORAS NI SI BORU 

Nakkin nunga dipasahat inanta sipanganon upa upa tu ho boru dohot helakku ima indahan na las dohot dekke sitio tio

Nuaing pe tutu pasahatonhu ma tu ho boru dohot helakku ulos mula gabe ( diuloshon ma ulosi sian siamun ni helana dohot borunai tu hambirang huhut idok hatana )

On ma ulos mula gabe di ho boru hasian dohot dihamu Amang Hela. Ulos na nirasian  do on,asa anggiat sarasi badan dohot tondimuna, asa marrongkap gabe marrongkap mamora ma hamu mamangke ulos on. Ulos mula gabe ma di hamu ulos on, asa tangkas haroan  marharoanan siampu-ampuonmuna jala situak-tuakonmuna tu joloan ni ari on. Ulos mula gabe ma on parmulaan muna gabe, mangulosi anak dohot boru di hamu.

Sai tibu ma sorang haroan na tapaima-ima di ari na uli dia ari na denggan, so hariboriboan, asa marurat hamu tu toru, jala marbulung tu ginjang, mangerbang mangalaung tu lambung.

Songon hata ni umpasa :

Togu  urat ni ri, togu do nang urat ni singkoru

Ulos mula gabe na hupasahat hami, sai saur ma i di hamu, mangulosi anak dohot boru.

   

Tubu  ma lata di toru ni bunga bunga

Sai tubu ma di hamu anak na marsangap dohot boru siboan tua.

Sahat-sahat ni solu, sahat ma tu bontean

Sahat ma hamu leleng mangolu, sahat tu parhorasan sahat tu panggabean.

(Dung i dibuat amanta i ma muse boras sipir ni tondi sian pinggan naung diparade hian, laos didok ma) 

Pir ma pongki, bahul bahul ma pansalangon

Sai pir ma tondi, sai ro angka parsaulian

Pir ma tondi madingin, horas tondi matogu.

(Parjolo ma dibahen amanta i tu simanjujungna baru pe asa tu simajujung ni boruna, jala didok ma muse)

Pir ma tondim boru hasian. Dao ma sahit sian badan dohot sahit ni pingkiran sian ho, asa tulus ma na taparsinta i jaloon muna. Horas ma na ro, horas ma hita na paimahon. (Laos songon i ma muse dibahen tu helana). On ma boras pir liat-liat tu hamu Parmoruan nami. (Dung i dihorashon tolu hali tu ginjang jala didok ma) Horas, horas, horas ma hita saluhutna! ( Di jalang  Parboru ma boruna, dohot helana,)

PARHATA NI PARBORU

Songoni ma amang boru nunga sikkop be hupasahat hami sipanganon upa upa, dohot ulos mula gabe suang songoni boras sipir ni tondi tu boru dohot hela nami

Partikkianon pe hupasahat hami ma tu hamuna. Botima

PARHATA NI PARANAK

Mauliate ma raja nami, raja ni hula hula, nunga tung takkas huida jala huhilala hami holong muna tu hami pamoruan muna tarlumobi mai tu borumuna ima parumaen nami

Asi ma roha ni Tuhan, sai di pasaut ma sudena tangiang munai

Andorang so marsipanganon hita raja nami, molo uli jala une di roha ni rajai jumolo ma nian hupasahat hami ima juhut namarsaudara tu adopan ni rajai, on pe raja nami asa mangarade ma hamuna

PARHATA NI PARBORU

Nauli amang boru, hutolopi hami ma pangidoan munai, asa pasahat hamu ma, nunga mangarade be hami

HATA NI PARANAK PASAHAT TUDU TUDU NI SIPANGANON

Di hamu saluhutna hula hula na huparsangapi hami, tung mansai las situtu do roha nami raja nami, manjalo holong dohot uli ni lagumuna na pinasahat muna tu hami pamoruan muna tarlumobi ma i tu parumaen dohot anak nami

Dison hupasahat hami do rajanami tudu tudu ni sipanganon na marsaudara, songon dalan nami pasangaphon hamuna hula hula nami, tung songonon pe na boi tarpatupa hami raja nami las ma roha muna

Asa dohonon ma songon nidok ni natua tua

Bagot do na marhalto, dolok do na marrobean

Horas ma hamu hula hula nami na manjalo, sai tu gandana ma di hami  na mangalean. Botima

PARHATA NI PARBORU

Mauliate ma amang boru, asa dos nakkokna, dos dohot tuatna

On pe naing ro ma hami pasahathon dekke simudurudur tu hamuna, asa mangarade ma hamuna amangboru nami

PARHATA NI PARANAK

Mauliate raja nami, pasahat hamuma nunga mangarade be hami 

PARHATA NI PARBORU

Tapuji ma Tuhanta, di hamu pamoruan nami, dison ro do hami pasahathon dekke simudurudur, dekke sitio tio, dekke sahat

Asa rap mudurudur ma hamu pamoruan nami tu dolok tu taruan, tio ma aek mual si inumon muna jala sahat akka nauli, sahat akka na denggan tumpahon ni Tuhanta pardenggan basai jaloon muna tarlumobi ma i di boru nami na paima ima haroan, tu joloanon 

Tung songonon pe dekke na boi hupasahat hami tu hamuna, las ma roha ni daging dohot tondi muna manjalo. Botima

( marsijalangan )

NB : Di nadeba adong do na patupahon, ima dung sikkop dipasahat parboru upa upa, ulos mula gabe dohot boras sipir ni tondi tu boru dohot helana langsung ma dipasahat parboru muse dekke si mudurudur tu pamoruon na baru pe asa ro paranak pasahathon tudu tudu/ panggori ni sipanganon

Molo tung diape sian na dua i na parjolo alai anggo  pasahat sipanganon upa upa dohot ulos mula gabe mangihut dohot boras sipir ni tondi ikkon do parjolo sahat i tu si boru na managam haroan sian hula hula, ala ido sintuhu ni ulaon dohot sintuhu ni haroro ni parboru

PARHATA NI PARANAK

Di hamu raja ni hula hula nami ala na naing marsipanganon ma hita, ise ma sian hita raja nami na laho siboan tangian parmanganonta

PARHATA NI PARBORU

Mauliate ma amang boru, dos rohatta, ala hamu do na paradehon sipanganonta laos hamu ma mambahen tangiang laho mangan . Botima

PARHATA NI PARANAK

Nauli amang boru ( martangiang )

Songoni ma di hita saluhutna, di amanta raja dohot inanta soripada tarlumobi ma di hamu hula hula nami asa dohonon nami ma songon huhuasi ni sipanganon

Tintin do na tinopa, hodong lais ni jabu. Otik so sadia pe sipanganon na tarpatupa, Debata ma na mamasu masu. Botima

Marsipanganon ma hita

NB : di tikki na marsipanganon di seati boru ni hula hula ma sadeba aliang, ate ate dohot pusu pusu, di bagihon ma i songon jambar sipanganon ni natorop

Dung simpul marsipanganon diuduti ma muse pakkataion

PARHATA NI PARBORU

Tauduti ma makkatai amang boru. Nakkin nunga di pasahat hamu tudu tudu ni sipanganon tu hami hula hula muna, jolo disise hata ma asa di seat raut, na manukkun ma hami amang boru tarsongon dia ma partordingna. Botima

PARHATA NI PARANAK

Nauli raja nami, tauduti ma tutu

Raja nami, raja ni hula hula nakkin nunga takkas  hupasahat hami tu raja i, jadi raja i ma na mangaturhon. Anggo hata sian hami surung surung muna doi raja nami. Botima

PARHATA NI PARBORU

Mauliate ma di hamu amang boru nami. Songonima di hamu boru nami asa pature hamu ma on di inganan na asing, asa niudutan ulaonta on ate amang boru, dos ma rohatta.

Hupasahat hami ma partikkianon tu hamuna asa hamu ma na mangaturhon pakkataionta

PARHATA NI PARANAK

Nauli raja nami dos rohatta, tauduti ma tutu

Gabe ma jala horas raja nami, nunga tung uli jala une mardalan ulaonta dohot denggan dibagasan las ni roha, andorang so tauduti dohot tu na marhata sigabe gabe raja nami, molo tung uli jala une di roha ni raja i, asa jumolo ma jo hami nian pasahathon batu ni sulang dohot pasituak na tonggi tu hamu saluhutna hula hula nami. Botima

PARHATA NI PARBORU

Nauli amang boru, huoloi hami ma pangidoan munai, nuaing pe pasahat hamu ma nunga mangarade be hami

Parjolo ma pasahat hamu batu ni sulang tu suhut nami dungi pe asa pasahat hamu pasituak na tonggi tu hami na marhahaanggi mangihut ma annon muse sahat tu boru bere nami. Botima

Dung sikkop sude di pasahat paranak ( anak dohot parumaen nasida ) batu ni sulang dohot pasituak na tonggi tu sude uduran ni hula hula, di uduti ma muse pakkataion

PARHATA NI PARANAK

Mauliate ma amang boru nunga tung sikkop jala sonang roha nami diakka batu ni sulang dohot pasituak natonggi naung pinasahat muna tu hami. Partikkianon pe hupasahat hami ma tu hamuna

PARHATA NI PARANAK

Mauliate jala malambok pusu ma di hamu raja nami, nunga tung sonang roha nami umbege hata muna i, nang pe so sadia na tarpasahat hami raja nami sai Tuhanta ma na mamasu masu

Nuaing pe attong raja nami, ala na mauas male do hami di hata pasu, hata gabe sian hamu saluhut na hula hula nami, on pe raja nami asa pasu pasu hamu ma hami pamoruon muna tarlumobi ma tu boru dohot hela muna marhite hata nauli hata sigabe gabe. Botima

Dungi diuduti ma 

- Pasahat hata pasu pasu dohot hata si gabe gabe sian hula hula

- Mangampu paranak + hela dohot boruna

- Di tutup ma marhite ende dohot tangiang sian hula hula

Ala ulaon na somal namai, jadi dang pola be nigurethon

Songonima sada tudosan ulaon adat pasahat ulos mula gabe

Molo tung marasing jala berbeda pe pangulahon ni ulaoni di luatta be asa dohonon ma songon nidok ni natua tua

Asing duhut asing sihaporna

Asing luat asing pangulahonni paradatonna

Horas ma jala gabe