UNGKAP HOMBUNG

Hombung : penyimpanan barang berharga , uang, emas, ulos dan pakaian (sejenis lemari yang terbuat dari kayu bulat, dipahat dilobangi dan diberi tutup ).

Siungkap hombung ima apala ama naposo ni ina namonding.

Ia acara ungkap hombung holan di parmonding ni ina Sarimatua/ Saurmatua naung titir maranak titir marboru marpahompu sian anak marpahompu sian boru dohot  * marnini marnono * (molo tung sahat).

Molo ama do parjolo marujung jala mangolu dope ina ndang dipamasa dope namangungkap hombung ai ina i do sitiop hombung.

Ia tujuan ni ungkap hombung ima mangido manang aha lomoni roha ni ama naposo ni namonding i sian barang tininggalhon ni namboruna.

Boido mas , hepeng, pinahan manang arta na asing.

Molo dipartingkian nuaeng nunga dipahibul marhite hepeng napeak diatas pinggan asa patar sadia bahatna.

Dung simpul ulaon sian udean dipanangkokma hulahula dohot tulang tu tonga ni bagas sibagandingtua. Diaturhon ma parhundul asa tangkas masiadopan hasuhuton bolon dohot hulahula nang tulang.

Hasuhuton bolon paradehon juhut na marsaudara jala horong ni hulahula paradehon dengke.

Ianggo tulang ndangpola be mamboan dengke nasida.

Dung masitariparan di angka parbue ni holong marhite sipanganon namarsaudara dohot dengke diudutima tu namarsipanganon.

Dung simpul marsipanganon dipungkama panghataion.

Manise ma horong ni hulahula taringot di sintuhu ni sipanganon naung dijalo nasida.

Hula hula : Ima tutu Raja ni boru , bere bangkonamai jolo ninangnang asa ninungnung. Jolo nipangan asa nisungkun taringot sintuhu ni sipanganon naung sun taparhajop.

Ia nunga tangkas hami bosur manganhon indahan na las sagat marlompan juhut natabo jala sombu uas nami manginum aek tio natinahu muna.

Nunga disi gandina

Disi nang gandona

Nunga disi daina

Disi do nang tabona

Sirsir dohot ansimna

Hona dohot asomna

Asa dohononma 

Bagot namarhalto 

Niagatan dirobean

Horasma hami namanganhon

Horasma hamu namangalehon.

Jadi amangboru

Diama langkatna

Diama unokna

Diama hatana

Diama nidokna

Tangkasma hamu marboa boa.

Hasuhuton bolon: Ima tutu rajanami taringot di sintuhu ni sipanganon naung sun taparhajob asa dohonon nami ma rajanami godang sibutong butong otik sipirni tondi. Pamurnas mai tudaging saudara tubohi sipasindak panaili ma i sipaneang holiholi.

Otik so sadiape naboi tarpatupa hami ndada namangholit rajanami. Tungsura pe namangholit tu gandana ma asa boi tarpatupahami sipanganon natumangkas sian i laho pasangap raja i.

Jadi taringot disipanganon  barita ni panggabean parhorasan ma nidokna. Botima

Hulahula: Mauliatema amangboru ba molo ido tutu dohononnami ma songon ni dokni sijolo tubu

Hauma ni Parsambilan

Jonok tu pargadongan

Martamba tamba ma dihamu parsaulian

Jala dor nang pangomoan

Asa dengke salesale

Dengke ni namora

Siangkup ni nagabe

Tibu hamu mamora

Alai amangboru

Marangkup do nauli

Mardongan do nadenggan

Siangkupna songon nahundul

Sidonganan songon na mardalan

Asa tung tangkasma hatahon hamu.

Hasuhuton : Ima tutu Tulang rajanami tangkasma hatahonon nami nasolot diate ate gompang dipusu pusu nami. Ia nunga rap tataruhon ina nami tu inganan parsatongkinan i tu situmandok  ba onpe rajanami panangkohon nami ma rajai tu tonga ni bagas sibaganding tua nami asa anggiat marhite hite tangiang ni raja i tunangkokna songon dolok tu pangkalna songon buar buar barita sigabe gabe barita sihoras horas namanghirap sian nadao manjou sian najonok dihami beremuna nang saluhut pomparan ni dainang naung jumolo i. Onpe rajanami namangido dope hami tu tua dohot sangap ni raja i dihata tangiang hata pangidoan hata pasu sian hamu rajani hulahula dohot tulang nami.

Botima.

Hulahula/ Tulang: Ba molo ido tutu posma rohamuna ianggo pangidoan nunai sai na leanon nami ma i ai

Aek natio

Riongriong di pinggan pasu

Hulahula naburju do hami

Naringgas mamasu masu

Andorang so hupasahat hami hata nauli hata nadenggan hata tangiang hata pangidoan hata pasu asa pasahat hamuma jolo anak hinsu ni hombung ni namboru nami i asa rap manigati hita.

 Ai tangkas do huboto hami godang do nasinari ni namboru nami i andorang di ngoluna.

Botima

Hasuhuton bolon:

Mauliatema tulang tohomai pinangido ni rajai jala adatna do i tutu molo dung saurmatua boruniba ba ingkon pamasaon ma ungkap hombung manigati arta natinadinghonna.

Holan on rajanami dunghon panading ni damang marpulu taon naung salpui nunga diungkap dainang hombung i asa adong bahenonna laho parmudu mudu sude ianakhon na tinadinghon ni damang haporluan siganup ari sahat tu singkola natimbo.

Nunga husigat hami rajanami holan on nama pasipasina, huhut dipasahatma hepeng diatas ni piring. 

Hulahula: Ba mauliatema bere alai adong dope ra tambana bahenonmuna laho palashon rohanami tulang muna ai torop do hami nangkok tu bagas on.

Hasuhuton: Ima tutu tulang rajanami nangkin nunga huhatahon hami holan i nama pasipasi nasinari ni dainang i. Alai nunga tung apala mangigil rajai molo pe otik sosadia naboi hupatupa hami laho palashon rohani rajai ba ulima rohani rajai ai huboto hami naburju do rajai sihorus nalobi sigohi nalonga.

Mardalanma hasuhuton manjalang huhut mangakehon hepeng tu rombongan i.

Dung ris sude dapotan diudutima marhata sigabe gabe sihoras horas tu berena.

Dung mangampu hasuhuton di ujungima dohot tangiang.

# Somalna namasa na binereng molo humurang pansarian ni pinomparna  dielek / disombasomba ma hulahula dohot tulang asa las ma roha nasida jala mangoloi . Ditingki pasahathon pisopiso naganjang laos mangihutma amplop songon singkat ni ungkap hombung.Jadi ndang pola dipanangkok be tu bagas sibaganding tua.