ULAON SAUR MATUA

ULAON SAUR MATUA

 Molo matua sada natua-tua naung saurmatua, paboahon ma i antong tu dongan natua-tua, tu sude horong ni Tulang dohot Hula—hula, Raja ni Boru dohot Raja ni Dongan Sahuta.

Persiapan: asa tipak bostang na marujung ngolu i di podomanna di tonga ni mangajana, jala suman ma dipaheani dohot ulos saput na sementara, paima dipasahat Tulang na naeng siboanonna. Ulos Punsa manang Ragi Idup do sibahenon. Diparrohahon ma dohot parpeak ni tanganna, unang be lompit tu jolo, alai songon na mangambe na ma, ai nunga saurmatua. Dungi pintor dihobasi ma mambahen sijagaron, i ma ampang si opat suhi, na marisihon :

1. Eme Sitamba Tua.

2. Pira ni manuk dohot gambiri.

3. Sanggar.

4. Baringin.

5. Hariara.

6. Silinjuang.

7. Sihilap.

8. Ompu-ompu (raja ni duhut-duhut).

Dipeakhon ma i, di halangulu ni na marujung ngolu i. Dungi masipadosan tahi ma sude pomparan ni natua-tua i dohot haha anggina, boruna taringot tu adat sipatupaon di partuaon ni natua-tua i. Patotaon na ma sude horong ni Hula-hula dohot sisolhot, asa dipasahat barita tu nasida be, i ma:

1. Tulang.

2. Hula-hula.

3. Bona Tulang.

4. Tulang Rorobot.

5. Tulang Mangihut.

6. Bona ni Ari.

7. Mataniari Binsar.

8. Hula-hula na Marhaha Maranggi.

9. Hula-hula Naposo / Parsiat.

10. Hula-hula Anak Manjae.

11. Pariban.

12. Simatua ni Boru.

13. Boru Sihabolonan.

14. Boru Natua-tua.

15. Boru Naposo.

16. Dohot sude, ale-ale nang sisolhot.

Molo dung ditontuhon ari partuatna, patupaon ma parjolo, Ria Raja. Molo  Ria Raja on, nunga parjolo marboa-boa paidua ni hasuhuton tu Raja ni Dongan Sahuta, Hula-hula dohot tu sude na ro maningkir di bodari ni andorang so Ria Raja i.

Ria Raja

Ndang Tonggo Raja, somal na sai dipungka ma i jam 7.30 manang jam 8.00 bodarina. Dung marnatampak sude juara na torop, dipatota ma parhundulon songon on;

Hundulma di jolo ruma / jabu; Hasuhuton, na Marhaha Maranggi, na Mardongan Tubu dohot na Marpariban.

Masiadop-adopan ma dohot Raja ni Dongan Sahuta, Hombar Huta dohot angka Ale-ale.

Disabola siamun ni hasuhuton ma, sude Tulang dohot horong ni Hula-hula.

Disabola hambirang ni hasuhuton ma, Boru, Simatua ni Boru, Bere dohot Ibebere.

Dung renta saluhut na i, sai masirenggetan ma jolo hasuhuton,laho manontuhon ise na gabe Raja Parsinabung, laos songon i do Natua-tua ni Huta, jolo masialapan sangap / hata manang ise na gabe Siparhata.

Sai Natua-tua ni huta do manise bona ni hasuhuton, siseonna ma; ”Mauliate ma parjolo tapasahat tu Amanta Debata Pardenggan Basa i, naung mangalehon hahipason di hita, boi hita marpungu gabe horas di pargok ni mataniari on, di jolo jabu simanguliman on. Gokhon sipaimaon, jou-jou sialusan, di gora-gora / jou-jou muna nunga dison hami Dongan Sahuta muna. Sise do antong mula ni hata, sungkun mula ni uhum, siseon nami ma hamu, asa manghatai hita, sungkunon nami ma hamu, aha na naeng siulaon ta”.

“Tarbege hami do soara ni ende marsaor andung sian tonga bagas on, marlao ro angka inanta soripada manghadang ulosna manopot bagas on, laos godang hubereng hami angka bunga papan humaliang on, ai aha do huroha na masa di tonga ni mangjana? I ma sise nami bona ni hasuhuton”.

Alusan ni Parsinabung ni suhut ma i ; “I ma da Rajanami, sintong do songon na nidok muna i, nunga marombas-ombas angka na marholong ni roha, ro  tu bagas on, ala naung marujung ngolu do Amanami, na tahaholongi, na diari ...... naung bostang nuaeng di jabu, asa tangianghon hamu, hami lumobi ma pinompar ni natua-tua nami i”.

Udutan ni Natua-tua ni Huta ma : “Naung marujung ngolu do hape natua-tua i na diari ......, hami pe dohot do mararsak ni roha, sai Tuhanta ma na mangapuli sude pinomparna. Suhut nami, atik tung adong dope sisolhot na so sahat barita manang sialapan, rade do hami sian Dongan Sahuta laho mangurupi“.

Alusan ni pihak hasuhuton m : “Mauliate ma Rajanami dipaniroion muna i, anggo taringot tu boa-boa dohot na naeng sialapan, nunga sahat hubahen hami. Molo tung so dison do pe nasida saonari, anggo marsogot nunga rade nasida”.

Natua-tua ni Huta: “Antong asa boi tangkas ditiroi Tulang / Hula-hula dohot Raja hamu bona ni hasuhuton, patorang hamu ma jolo taringot tu parpinomparon ni natua-tua i, molo taringot tu torop na, tu ari marsogot pe paboa hamu”.

Parsinabung suhut: “Ia amanami on, nunga godang dijalo pasu-pasu andorang di ngoluna, nang marhite angka ianakkonna sian Amanta Debata. Amanami on, titir do maranak, titir do marboru, marpahompu sian anak, marpahompu sian boru, sahat tu na marnini dohot marnono, jala nunga sude gelleng na marhasohotan. Dilehon Debata do umur na ganjang ..... taon, Dipanggoarhon ma : Ompu .......................... doli. Alani ma Rajanami dohot disude horong ni Tulang dohot Hula-hula, ia ulaon dipartuat ni natua-tua on i ma Ulaon Saurmatua. Songon i ma pandohan nami, sitiroan jala sisuran muna”.

Natua-tua ni Huta: “Nunga tangkas binege parpinomparan ni natua-tua i, sitorop pinompar, sideak pangisi, siganjang umur, hombar tu adat dohot uhum, na pinungka ni ompunta na parjolo i, nungga tung sintong goar ni ulaon sipatupaon i, Ulaon Saurmatua. Manolopi nauli, manolopi na denggan ma hami sian Natua-tua ni Huta. Asa tung rintar songon bonang digala, paliat hamu ma tu sude Tulang dohot Hula-hula, na mardongan tubu, Pariban dohot Raja ni Boru”.

Parsinabung ni suhut: “Di hamu Tulang nami ........, tuturi hamu hami rajanami, sauri hamu pangidoan nami i”.

Alusan ni Tulang ma i, tiroan na jala sauranna ma manolopi nauli na denggan, laos songoni ma sude nasa Hula-hula, taringot tu goar Ulon Saurmatua. Dungi mulak ma muse tu Natua-tua ni Huta, asa diuduti pangkataion. 

Natua-tua ni Huta: “Hamu bona ni hasuhuton, asa boi tung tangkas tuturan, tiroan dohot sauran Ulaon Saurmatua naung tagabehon i, songon dia ma konsep na naeng sipatupahonmu, tordahon hamu ma, tutur songon  rahuton baion login, jojor songon tangga ni balatuk”.

Parsinabung ni suhut; “Songonon ma disangkapi roha nami. Raja nami, molo tung adong na hurang lobi, rade do hami ajaran mu :

1. Jam 9.00 wib, acara khusus ni keluarga

2. Jam 10.00 wib, diparnakkok ni mataniari, mompo ma natua-tua on tu  ruma-rumana. Marnatampak ma disi, Hasuhuton, Tulang, Hula-hula, Boru dohot Natua-tua ni Huta, dohot Pangula ni Huria.

3. Jam 11.00 wib, maralaman ma natua-tua i.

4. Jahaon nami ma tertib acara, sipaihut-ihuton di partuaon ni natua-tua i.

5. Dung denggan ditolopi Hula-hula dohot Natua-tua ni Huta, pasahathon ma

tu Pangula ni Huria, asa nasida mambuka ulaon i.

6. Marhuhuasi ma paidua ni hasuhuthon, laos paboahon tarombo na jempek dohot riwayat hidup / jujur ngolu natua-tua i.

7. Parjolo ma jouon Tulang dohot rombongan na laho mamboan parbue pir dohot eme na marlundu. Laos dipartingkian i ma nasida pasahat adat dohot pasu-pasu.

8. Marudut ma muse, mandok hata pasu-pasu, Hula-hula, songon i ma tu Bona Tulang, Tulang Rorobot dohot satorus na.

9. Manang na piga acar mardalan, molo dung dapot tingki jam 14.00 wib manang jam 2.00 wib, mangulon ma laho marsipanganon.

10. Ditingki na manortori Tulang dohot Hula-hula, laos pasahathon do jambar na hombar tu nasida. (ndang dohonon nami : tortor mangalap jambar). Angka jambar naso sahat ditingki na manortor i, di tingki marsipanganon ni ma pasahathon nami.

11. Ia boan / sipatupaon nami, Gaja Toba ma.

12. Parjambaran na masa di hami, pasahathon nami ma, ihur-ihur (namarhodong) tu Tulang, jala osang ma tu Hula-hula, na marngingi parsiamun tu Bona Tulang, na marngingi parhambirang tu Tulang Rorobot, tanggalan tu Boru Tubu, somba tu Bona ni Ari dohot tu Mataniari Binsar, soit bolon tu Natua-tua ni Huta, laos angka jambar na gok tu angka Hula-hula Naposo dohot satorus na.

13. Adong do pinatupa musik ni Eropa ganti ni ogung sabangunan.

14. Ndang pola jaloon nami ulos holong sian Hula-hula Naposo, sai adong do tingki muse jaloon nami. Tung angka ulos na marhadohan i ma dipasahat Tulang, Hula-hula dohot Hula-hula Naposo / na marhaha maranggi.

15. Dung sidung marsipanganon, udutan ma muse acara na mangihut.

Songon i ma rajanami, pandohan nami, sitiroan jala sisauran muna, molo tung adong na hurang lobi, rade do hami ajaran muna”. Hombar tu boa-boa ni hasuhuton i, tiroan jala sauran ni Tulang / Hula-hula dohot Natua-tua ni Huta ma i.

Di tingki Ria Raja i, paboaon ni Hasuhuton do tu Hula-hula / Tulang na dohot Dongan Sahuta, napanakkohonna do tu jabu nasida ndung mulak sian parbandaan, laho mangulahon adat Ungkap Hombung molo ina na saurmatua, pasahat Piso Na Ganjang molo ama na saurmatua. Alai laos boi do di alaman dibahoni, molo jolo dialap hata dohot alasan na tepat, umpamana tu Bona Pasogit do suanhononton natua-tuai, ai maol nama ulaon i jolo mulak sian Bona Pasogit.

Di piga-piga luat / huta, sai adong do na pasahat sangap / jambar hata tu pomparan ni si Raja Batak, molo songon i, ulaon saurmatua, jala sigagat duhut partuatna. Dipaampuhon natua-tua ni Huta ma panggabean / parhorasan i tu bona ni hasuhuton. Sai jolo Pamoruon ni suhut ma jumolo mangampu, i pe asa suhut sihabolonan. Andorang so ditutup dohot tangiang, marboa-boa do hasuhutan, ala adong do dipatupa boru songon pandungo i, asa las dohot i ditangianghon, ai laos udut ma marsipanganon. Ditutup ma dohot tangiang, na niuluhon ni Tulang / Hula—hula.

Songon i ma na masa pinaihut-ihut di tano parserahan Simalungun dohot na humaliangna. Molo tung adong na hurang lobi, songon hata ni Situa-tua ma dohonon, “Tuat siputi, nangkok sideak, ia i ma na ummuli, sai i ma ta pareak.