ULOS GANJANG DANG TUK, JEMPEK HAURHAUR

ULOS GANJANG DANG TUK, JEMPEK HAURHAUR

Di tinghi partuat manang parmonding ni natuatua (Sarimatua, Saurmatua, Maulibulung) dijou do sude horong ni hulahula sian parginjang sahat rodi partoru, i ma: Bona Niari; Bona Tulang; Tulang; Hulahula, Hulahula Marhaha Maranggi/Martinodohon; Tulang Rorobot; Hulahula Parsiat/Naposo; Hulahula Simanjunghot; Hulahula Anak Mangulahi/Nini (NB: sahat tu ombas on dang dapot iba dope goar panjouon na tanghas, alani molo tung adong Amatta Raja, Inatta Soripada na tanghas umbotosa pabotohon hamu ma jolo asa lam tamba parbonotoan niba). 

Panjouon horong hulahula hombar ma i tu partording panurston Jujur Ngolu (Riwayat Singkat-red) natuatua na marujung ngolu manang na monding sian tarombo (silsilah) Amang Mangulahi hombar tu panjouon Hulahula Bona Niari. 

Molo dijou Hulahula Bona Niari tontu luluanna ma berena tubu ni ibotona, i ma; pomparan ni ompu martinodohon/marhaha maranggi dohot beberena manang pomparan ni boru ni ibotona. Songoni ma sude horong ni hulahula mangalului angha bere, beberena be asa tampak mangadopi harorona diulaon nagok partuat manang parmonding ni natuatua. 

Molo ni parrohahon, pinarateatehon partording ulaon nagok partuat ni natuatua di ombas na parpudion nunga jotjot hurang ampit, momos pardalan ni ulos paniari manang ulos panggabei sian horong ni hulahula gabe jotjot partording ni ulos i "Ganjang dang tuk, Jempek haurhaur" na mambahen tubu hansit ni roha na marhaha maranggi, mariboto atik pe dang pola ditariashon ditonga ni mangajana. 

Nian nunga adong marga na so apala dipamasa be manjalo ulos paniari manang ulos panggabei ditinghi parmonding ni natuatua. Sunghup ma holan ulos saput, ulos tujung (sarimatua) ulos sampetua (saurmatua, maulibulung) dipasahat hulahula manang tulang. 

Laos adong do luat ulos saput dohot ulos tujung/ulos sampetua sian hulahula. Alai ianggo di luat Humbang na sae molo monding  sahalak ama (sarimatua, saurmatua, maulibulung) sai tulangna do manaputi berena, sian hulahulana ulos tujung/ulos sampetua, songoni nang sabalikna hombar tu pandohan ditinghi ulaon unjuk tulang manjalo "unghap hombung/tintin maranghup" sian simatua ni berena. 

Ditinghi ulaon unjuk/mangadati dipasahat parboru manang simatua ni bere do sian sinamot ni boruna tu tulang ni pangoli (helana) "unghap hombung/tintin maranghup" tanda na sada boru dohot tulang ni helana songon hata ni umpama na mandok, "Hot pe jabu i hot margulang-gulang, Boru ni ise pe dialap bere i tong do i boru ni tulang". 

Laos di ombas i ma didok hulahula parboru tu tulang ni helana, "Haha ni paradaton, molo hamu dijolo hami ma dipudi muna, molo hami dijolo hamu ma dipudi nami molo adong ulaon adat di parboruonta on" ninna. 

Na marlapatan do pandohan on, molo  monding natuatua ama tulangna ma "manaput" manang pasahat saput ni berena, hulahulana ma pasahat ulos tujung/sampetua ni boruna, suang songoni ma sabalikna (Humbang-red). 

Di ombas na parpudion nunga jotjot digollit (dibatasi-red) ulos paniari manang ulos panggabei sian horong hulahula: bona tulang; bona niari; tulang rorobot; na marhaha maranggi/martinodohon; parsiat/naposo; simanjunghot, dlna isarana; tolu (3) bulung. Alai ianggo ulos sian hulahula pangalapan boru, ulos sian tulang ni na monding dang digollit manang piga bulung. 

Na gabe sunghun-sunghun, tu ise do hasahatan manang hasanghotan ni ulos sian hulahula: bona niari; bona tulang; tulang rorobot; na martinodohon/marhaha maranggi; parsiat/naposo; simanjunghot, dlna ditinghi monding natuatua.....??? 

Sunghun-sunghun on i ma patotahon partording ni ulos paniari manang ulos panggabei tu hahotanna asa unang adong pandohan, "Ulos ganjang dang tuk, Jempek haurhaur" songon judul ni guretan on. 

1. Hulahula Bona Niari. 

Molo ro hulahula bona niari i ma hulahula Amang Mangulahi luluanna ma pimparan  berena dohot beberena i ma tubu ni ibotona asa rap renta, rinding mangadopi harorona. 

Pomparan ni Amang Mangulahi i ma pomparan ni ompung martinodohon dohot ibotona. 

Jadi ulos sian Hulahula Bona Niari une, uli, lehet dohot denggan ma molo pardalan ni ulos i; sada ma tu pinompar ni ompu martinodohon/marhaha maranggi; sada ma tu pinompar ni boru ompu martinodohon/marhaha maranggi; sada nai tu ianakhon ni natuatua na monding. 

2. Hulahula Bona Tulang. 

Molo ro Hulahula Bona Tulang manang Hulahula ni Ompung luluanna ma pomparan ni berena dohot beberena asa rap renta, rinding mangadopi harorona. 

Bere, bebere ni Hulahula Bona Tulang (hulahula ni ompung) i ma pomparan ni Ama na martinodohon/marhaha maranggi dohot ibotona. 

Alani i une, uli, lehet, denggan ma molo hasahatan manang hasanghotan ni ulos sian Hulahula Bona Tulang: sada tu Ama na martinodohon/marhaha maranggi manang pomparanna; sada tu iboto Ama na marhaha marranggi/martinodohon manang pomparanna; sada nai tu ianakhon ni natuatua na monding. 

3. Tulang Rorobot i ma tulang ni Inong pangintubu manang hulahula ni hulahula ni inong niba. 

Ditinghi monding natuatua (Ama, Ina) ro do Tulang Rorobot luluanna ma haha anggi dohot iboto ni na monding i asa renta, rinding mangadopi harorona. 

Alani une, uli, lehet, denggan ma molo hasahatan manang hasanghotan ni ulos sian Tulang Rorobot: sada tu haha anggi manang pomparan ni haha anggi ni na monding; sada tu iboto manang pomparan ni iboto ni na monding; sada nai tu ianakhon ni na monding. 

4. Hulahula na Marhaha Maranggi/Martinodohon. 

Hulahula na Marhaha Maranggi/Martinodohon i ma hulahula pangalapan boru ni haha anggi ni na monding. 

Ditinghi ro odoran ni hulahula haha maranggi luluanna ma haha anggi dohot iboto ni na monding asa renta, rinding mangadopi harorona. 

Alani une, uli, lehet, denggan ma nian hasahatan manang hasanghotan ulos sian hulahula marhaha maranggi: sada ma tu helana manang pomparanna; sada tu iboto manang pomparan ni iboto ni na mobding; sada nai tu ianakhon ni na monding. 

5. Tulang. 

Tulang i ma hulahula ni Inong ni Ama  natuatua na monding. 

Ditinghi ro odoran ni tulang ni Ama na monding renta, rinding do haha anggi, iboto ni na monding mangadopi haroro ni odoran ni tulang. 

Sa Tulang do na monding dohot haha anggina  dohot ibotona i ma hulahula ni Amongna, Inongna. 

Luluan ni Tulang ma sude bere, beberena (pinompar ni ibotona) asa renta, rinding mangadopi harorona. 

Alani une, uli, lehet, denggan ma nian hasahatan manang hasanghotan ni ulos sian tulang: sada ma tu na marhaha maranggi manang pomparanna; sada tu iboto manang pomparanna; sude ma ianakhon (anak dohot boru) ni na monding; tu pahompu sian anak pahompu sian boru; tu nini, nono molo nunga marnini marnono natuatua na monding i. 

6. Hulahula. 

Hulahula i ma hulahula pangalapan boru Ama na monding manang hulahula ni Ina na monding. 

Ditinghi ro odoran ni hulahula luluanna ma berena, beberena tubu ni ibotona dohot haha anggi, iboto ni na monding asa renta, rinding mangadopi harorona. 

Alani mansai uli, une, lehet, denggan molo hasahatan manang hasanghotan ni ulos sian hulahula: sada tu haha anggi ni na monding manang pomparanna; sada tu iboto manang pomparan ni iboto ni na monding; sude ma bere, bebere tubu ni ibotona; pahompu sian anak, pahompu sian boru; nini, nono molo nunga marnini marnono na monding i. 

7. Hulahula Parsiat/Naposo. 

Hulahula Parsiat/Naposo i ma hulahula pangalapan boru ni anak (baoa) ni na monding. 

Luluan ni hulahula parsiat/naposo ma helana martinodohon dohot ibotona asa renta, rinding mangadopi haroro ni hulahula parsiat. 

Alani mansai uli, une, lehet, denggan hasahatan manang hasanghotan ni ulos sian hulahula parsiat/naposo: sada tu helana/boruna; sada tu pahompuna; sada tu haha anggi ni helana/boruna. 

8. Hulahula Simanjunghot. 

Hulahula Simanjunghot i ma hulahula pangalapan boru pahompu ni na monding. 

Ditinghi ro odoran ni hulahula simanjunghot rap renta, rinding do sude pomparan ni na monding i mangadopi hahoro ni odoran hulahula simanjunghot. 

Alani i mansai uli  une, lehet, denggan hasahatan manang hasanghotan ni ulos sian hulahula simanjunghot: sada ma tu helana/boruna; sada tu pahompuna; sada tu iboto ni helana/boruna. 

Ianggo hulahula ni Anak Mangulahi manang Nini nunga dang piga be adong di ombas na parpudion, tarlumobi ma di sundut na sai diparsingholahon ianakhonna marsinghola na timbo. Molo tung adong pe hulahula ni Anak Mangulahi manang Nini ni natuatua na monding tong do sarupa partording hasahatan manang hasanghotan ni ulos sian hulahula Anak Mangulahi/Nini songon hulahula parsiat/naposo. 

Guretan on boi dang apala sarupa diganup- ganup luat dipangulahonna hombar tu adat hasomalan na niihuthononna be. Alai atik pe songoni sada dalan ma on laho manguhal, padimundimunhon dohot masilehonan pangantusion asa unang be adong pandohan, "Ulos ganjang dang tuk, jempek haurhaur" di ulaon nagok partuat manang parmonding ni.natuatua. 

Ai olo do dijou horong ni hulahula alai dang apala hantus dohot ampit hasahatan manang hasanghotan ni ulos, ai sai holan ianakhon ni na monding manjalo, dang dapotan pomparan ni ompu martinodohon, ama na martinodohon, hape sada hasuhuton bolon dope rodi pomparan Amang Mangulahi hombar dipanjouon Hulahula Bona Niari dohot panjahaon Jujur Ngolu ni natuatua na monding. 

Hurang do ulina, unena, lehetna dohot dengganna sahasuhuton adong na holan panondur, pamerengmereng diulaon nagok partuat manang parmonding ni natuatua (sarimatua, saurmatua, maulibulung) na boi patubu na so masiantusan dohot hansit ni roha. 

Sai anggiat ma marimpola guretan on laho patotahon ruhut-ruhut, patik, uhum habatahon pinungha ni sijolojolo tubu. 

Jumolo hami marsantabi molo tung adong na hurang ampit di guretan on. 

Mauliate ma di hita saluhutna. 

Horas ma jala gabe. Gabe ma jala horas.